الأربعاء، 14 مارس 2012

باتنين جنيه ثقافة بس اتوصي و النبي !!!

هل الثقافة سلعة تباع و تشتري ؟
هل هدف الكاتب هو الشهرة و جني المال من وراء أدبه ؟
أسئلة من المفترض أن أعلم اجاباتها بل و أجيب عليها بتلقائية تامة و لكن أحيانا هناك بعض الوقائع التي قد تجعلنا نشك في تلك البديهيات .
لن أحاول الاجابة علي تلك الأسئلة و لكني سوف أعرض موقفين متناقدين و لكم الحكم .
أحد أصدقائي هو مدون ، كان في بادئ الأمر يسعي من خلال مدونته لنشر الثقافة و تصحيح المفاهيم الخاطئة لدي المجتمع و كان يتناول المواضيع بمزيج رائع بين المزاح و الجدية مما كان يسهل علي القارئ تلك القضايا الفلسفية التي كان يناقشها .
كان كاتب وفير الانتاج بحيث أنه في أصعب الظروف كان يكتب مقال كل يومين و أنتشرت مدونته و أصبح له متابعيين ثابتيين يسعون لقراءة كل جديد يكتبه و لا أستطيع انكار اني واحد من هؤلاء المتابعيين بل و في بعض الاحيان كنت أكتب في نفس اطار الفكرة التي عبر عنها في مدونته علي سبيل التنافس و لا أستطيع اخفاء فرحتي عندما قابلته لاول مرة في أحد المقاهي بالصدفة البحتة حيث يجمعنا عدد من الأصدقاء المشتركيين .
مر أسبوع و لم أري مقال جديد لصديقي ، هل هو في ظرف صعب ؟ هل يجب ان اسأل عليه ؟ هل يجب أن أنتظر ؟
من الممكن ان تكون حالته النفسية سيئة و هذا ما جعله يبتعد عن الكتابة لفترة ، أفكرا متلاحقة تدور في رأسي و في النهاية قررت أن أفتح حسابه بأحد مواقع التواصل الاجتماعي و لم أكن أتخيل يوما ما قرأته .
كان أحد اصدقائه يسأله لماذا لم يكتب مقالا جديدا منذ فترة ؟
فقال له : كل ما أكتب حاجة جديدة ، اشيلها للشغل . شغل !!! شغل ايه ؟؟
فرد عليه : مجلة جديدة هنشر فيها .
و هنا علمت أنها النهاية الحتمية لمشروع كاتب موهوب .
و علي النقيض تماما مجموعة من الشباب المثقف تجمعهم صداقة قوية  قرروا أن يخدموا مجتمعهم بنشر الثقافة بين الاوساط الشبابية و بدأوا تنفيذ حلمهم و الغريب في الأمر أنهم يتعاملوا مع كلمة ليس من منطلق انها مبادرة ثقافية و لا انها نشاط ميداني و لكنهم يتعاملون معها علي انها صغيرتهم التي تكبر معهم كل يوم و تنتشر .
مجموعة من الشباب الموهوب قرر أن يختفي وراء ستار كلمة دون البحث عن شهرة او مجد شخصي او مجرد عائد مادي مقابل لما يبذلونه من مجهود و لكنهم يحصلون عن ما هو اسمي من كل ذلك احترامهم لذاتهم و اقتناعهم الشخصي بأنهم علي الطريق الصحيح .

و في النهاية أيهما أفضل من يبيع الثقافة او من ينشر الثقافة !!

الأربعاء، 7 مارس 2012

لحظات ليست فاصلة

من منكم يختبئ وراء ستار صنعه من خياله ليحافظ علي طهره !!
من منكم أحيانا يقوم بأفعال ليس لها تفسير منطقي ، و لا حتي الفاعل نفسه يعلم لماذا يقدم علي تلك الأفعال !!
من منكم يستطيع أن يملك الدنيا بما عليها و هو في الحقيقة لا يملك شيئا في هذه الدنيا !!
هناك لحظات فارقة في حياتنا و لكنها ليست فاصلة . تلك اللحظات الفارقة هي التي تستطيع تغيير نظام حياتنا بالكامل و لكننا لا نستطيع أن نتذكر تلك اللحظة و لا يشعر بها من حولنا.
أنا أتحدث عن تلك اللحظات التي يصل فيها الانسان الي نشوة التفكير و يكون في مثل غيبوبة بين الواقع و الخيال و لكنه حينما يفيق من تلك الغيبوبة سوف يجد أن صور كثيرة مشوشة في حياته قد أتضحت . من الممكن أن تكون تلك اللحظة التي تحتاج الي صفاء ذهني هي لحظة استرخاء وسط حوض من الماء الدافئ أو مثلا نومة خاطفة قد غمرت الانسان في خضم انشغاله و ربما أيضا تكون لحظة من لحظات انتظار اشارة المرور لكي يتحرك بسيارته في أشد الأوقات ازدحاما .
انها ليست أجمل اللحظات التي يعيشها الانسان و قد ينساها بمجرد الخروج منها الي العالم الخارجي و لكن نتاج هذه اللحظة من أفكار دائما يكون كالزهور التي تنبت وسط الصخور ، خلابة بدرجة لا توصف .
هل جرب أحدكم أن يكتب رسالة لشخص عزيز عليه و لكنه لم يجد كلمات يكتبها ؟ 
و يظل يحاول و يحاول و يكتب و يمسح ما كتبه و في النهاية يشعر أن ما بداخله تجاه هذا الشخص لا يمكن أن يوصف من خلال كلمات و بعد لحظات من الاسترخاء يقرر بأن يأتي بكلمات ليست كالكلمات و لكنه يكتفي بكلمتان " أنا هويت " .
هذا هو مغزي الحياة ، ما نراه معقدا هو في الحقيقة أبسط مما كنت نتوقع و لكننا نحمل ما يكفي من التعقيدات التي تكاد تعمينا عن حقائق الأمور .
أحب أن أكررها و لا أعلم لماذا ! , أحب أن أكتب و أظل أكتب و أكتب حتي أنسي الموضوع الذي كنت أكتب فيه و أعاود الكتابة و أحيانا أفقد الهدف مما  أكتبه و لكنني سعيد أني أكتب و سأظل أكتب .

متعودة دايما


فاكرين مسرحية شاهد ماشفش حاجة ؟
فاكرين اد ايه سرحان عبد البصير كان شخص سلبي في المحكمة بالرغم من كونه الشاهد الوحيد علي جريمة القتل ؟
بشري ! كلنا بقينا شاهد مشافش الحاجة و الحمد لله ، كلنا بقينا بنتفرج علي مشاهد الاعتداء علي المتظاهرين عادي جدا و لا كأننا بنتفرج علي فيلم عربي و الغريب أن كلنا اتفرجنا علي مذبحة بور سعيد اللي كانت كفيلة انها تكون شرارة لثورة ضد اكثر الانظمة الديكتاتورية المستبدة في العالم و برده متحركناش و بقي السؤال اللي شاغلنا كلنا ، هل لعب الكورة حرام ولا حلال ؟ و كثرت الأقاويل و كثرت الفتاوي و البرلمان شكل لجنة و جاري البحث عن تقرير اللجنة و اللعيبة اللي اعتزلت تراجعت عن قرار الاعتزال ( أصل الكورة مهمة وطنية ) و الأهلي عمل معسكر في دبي علشان اللعيبة تريح أعصابها و رجعوا يلعبوا مباريات ودية و الحياة بقي لونها بمبي و كأن شيئا لم يكن . 
الدنيا مبتقفش علي حد و اللي ماتوا ربنا كاتبلهم يموتوا ، عمرهم كدا ، ايه هنكفر ! 
و سيادة المشير قال بتحصل في أحسن العائلات عادي يعني مش قصة ايه يعني 77 واحد ماتوا ، كبروا دماغكوا ، بس أبو تريكة رفض أنه يسكت و رفض يسيب حق اللي ماتوا ، قرر بعد ما يجيب جول يقلع الشارة السودا و يحطها علي دماغه تكريما للشهداء و كأنه بيقول العين بصيرة و الايد قصيرة و كلها كام يوم و الدوري يرجع تاني و نتفرج علي متش القمة بين الأهلي و الزمالك و جماهير الأهلي هتشتم شيكابلا كالعادة و جماهير الزمالك هتشتم متعب كالعادة بردو ، بس لازم منظلمش اتحاد الكورة اللي هيرفض بداية المباراة بين الفريقين قبل دقيقة حداد علي ارواح اللي ماتوا ، عادي جدا ايه يعني لما يموت 77 انسان من 86 مليون ! ده حتي مفيش نسبة ولا كأن حصل حاجة .
متعودة دايما
فيها ايه يعني لما وزير التموين يقول " في ازمة في الأرز ، أعملوا المحشي بالمكرونة " طيب و اللهي فكرة مش يمكن يطلع أحلي بس علي شرط ، هو أول واحد يجرب المحشي بالمكرونة .
محدش يتنرفز ولا يحرق في دمه عادي جدا وزير من حكومة ما بعد الثورة  ....................................... ( كان في كلام بس اتمسح علشان الرقابة )
و فيها ايه يعني لما قضية التمويل الأجنبي اللي صدعونا بيها تخلص في الأخر علي سفر المتهمين الأمريكان في طائرة  حربية أمريكية و الجميع يتنصل من المسئولية ،  عادي جدا ولا فيها حاجة و ايه يعني لما رئيس الوزراء يصدعنا بمقولته الشهيرة "مصر لن تركع " و غالبا هو نسي يكملها " مصر لن تركع من أجل جنيهات ".
و الغريب في الأمر أن علي مدار التاريخ الحديث كله مفيش ثورة نجحت في مصر ، ثورة عرابي فشلت و جلبت الاحتلال الانجليزي علي مصر ، ثورة 1919 لو تحقق مطالبها و مات زعيم الأمة سعد زغلول و هو يقول كلمته الشهيرة " مفيش فايدة " .
ده حتي الانقلاب العسكري في 1952 فشل في مصر و مجلس قيادة الانقلاب (الثورة)  بدأوا يصفوا بعض بدم بارد .
واحد يسألني و يقولي أنت كاتب ليه بين قوسين ثورة ؟
أقوله علشان الحكومة قالت عليها ثورة ، هو أنا يا بيه  هعرف أكتر من الحكومة !!!
بس بما أننا جيل عنيد شوية فبصراحة مقدرش اتوقع انهم ممكن يقدروا يفشلوا ثورتنا كالعادة بالرغم من كل محاولتهم فالثورة ستنتصر .

.

الجمعة، 2 مارس 2012

كم أتوق لعناق حبيبة لم أقابلها بعد !

كم أتوق لعناق حبيبة لم أقابلها بعد !
أتوق  لنظرة من عينيها الملائكية ذات النظرات الثاقبة المليئة بالحنان و الجرأة و التحدي.
أتوق لضحكة من بين شفتيها لتمحو عن العالم أحزانه و اّلامه و تدخله في ربيع جناتها .
أتوق للمسة من يدها الدافئة المليئة بالحنان و الأمل و الطمأنينة .
كم أتوق لعناق حبيبتي لأشعر أن لي مكان في هذا العالم ، لأشعر أني ذات أهمية تذكر في هذا العالم .
حتي أستطيع الصمود وسط المعارك اليومية الطاحنة .
لأجد من يستطيع ولادة الأمل داخلي ان قدر الله سقوطي .
كم أتمني أن تهديني ابنا لي من بين أحشائها يكون لكل منا الأمل الذي يتجدد كل يوم .
كم أتوق لاخذها و البعد عن تلك البلاد التي شبعت من الموت .
كم أتوق لأن يطول عناقنا قدر المستطاع ، فعناقنا مثل النبيذ ، كلما مر عليه الوقت زادت حلاوته .
كم أتوق لعناق حبيبة لم أقابلها بعد !! 

الأربعاء، 29 فبراير 2012

عبارات متداولة

في حياتنا كلام كتير بنسمعه و بنردده بدون ما بنحاول نفكر فيه ، علي سبيل المثال " أنا بحبك " هنلاقي 90% من الشباب الحلويين عندهم اسهال في الجملة دي و يا ريت علي كده و بس ، لاء مصمم يعيش الحب الافلاطوني بالرغم من انه نسي أهم حاجة : مغزي العبارة دي ايه  .
" أنا بحبك " يا حلوف منك له المفروض انها وعد منك بأنك تعيش حياتك كلها وفي للانسانة اللي قلتلها بحبك مش مجرد كلمة بتقولها علشان خروجة و سينما و اللي أنت فاهمه !
و الغريب بجد أن برده 90% من البنات بيحبوا أوي يسمعوا الكلمة دي و بصراحة مش ناوي ألوم عليهم علشان هم عندهم ما يكفي من الهيافة اللي تخليهم يتهبلوا علي كلمة زي دي بدون ما يفهموا معناها .
أغلبية البنات عندهم استعداد يقضوا عمرهم كله قدام مسلسل غبي لمجرد أن بطل المسلسل أشقر و عنيه زرقا ، فكل اللي أقدر أقوله ربنا يهديكم و يرحمنا من هبلكم و يصبركم علي ما بلاكم .
طيب خلينا نتكلم بواقعية شوية و نبعد عن المثالية ، شاب مصري متربي علي الفضائل بمعني انه يتهم اي بنت ماشية ببنطلون ضيق في شرفها و يوميا يسهر علي المواقع الاباحية شاف بنت فعجبته و كان عايز يقولها بحبك و من منطلق ان الطيور علي امثالها تقع فالبنت برده متربية علي الفضائل بمعني انها حاسة باهتمامه الزايد و بتبادله نفس الشعور بس مشكلتها تتلخص في كونها خايفة من ان حد يشوفهم مع بعض ، يعني لو قدر يوفر مكان فاضي يقعدوا فيه يحبوا بعض بعيد عن البشر هي معندهاش أي مشكلة ، منتهي الازدواجية في الفكر .

و أحب أبشركم أنه مش بيحبها و لا هي بتحبه ، هو عايز يجرب احساس انه يفرض سيطرته علي واحدة و هي عايز تعيش الدور علي صحباتها بأنه بيكلمها كل خمس دقايق أصله بيموووت فيها و بيغير عليها موت موت موت ، تصدقوا قلبي اتشحتف !!

و بما انهم بقوا مع بعض فلازم كل واحد يفرض سيطرته علي التاني أو يعمل من الشخص التاني الشخص اللي كان نفسه يحبه و يرجعوا يرددوا العبارت الشهيرة في مجتمعنا و منها " اللي بيحب حد بيتغير علشانه " يا سلام ، تصدقوا جسمي قشعر !

البنت : أنت لازم تبطل تدخين ، ده غلط علي صحتك .
قال يعني خايفة علي صحته اوي ! طيب و سعادتك لما أتنيلتي علي عينك و حبيتيه مكنتيش عارفة انه بيدخن ؟
و الرد الطبيعي كنت عارفة بس فيها ايه لما أحاول أخليه يبطل !
أنا أحب أقول أنها مش خايفة علي صحته و لا عايزة تشوفه أحسن ، هي مجرد عايز تروح تقول لصاحبتها خليته يبطل تدخين و هما يردوا و يقولولها برافو عليكي يا كميلة !

الولد : انتي لازم تتحجبي و لبسك ده مينفعش خالص .
يا سلام علي أساس يعني أنك أتفاجئت دلوقتي انها مش محجبة و ستايل لبسها مش عاجبك ولا ايه ؟
أنت حبيتها زي ما هي و مش من حقك أنك تحاول تخليها تغير في نفسها و بلاش والنبي الحجة بتاعت أصلي بغير عليها علشان أنت و أنا فاهمين كويس أنك أصلا مصاحبها علشان تمشي معاها قدام صحابك و يقولوا عليك أنك راجل و مسيطر ، روح جتك نيلة أنت و صحابك .

اعتراف صغير
عارف أني كنت أوفر أوي و قصدت أني أجيب أسوأ الحالات ، ممكن جدا الولد أو البنت يكونوا بيتصرفوا التصرفات دي بنية سليمة و مش عايز أوجه اللوم كله عليهم ، المتهم الأول في القضية دي هو الجهل بس هما كمان اشتركوا في الجريمة .

متخافوش مش هقفل المقال بدون ما أتكلم عن الحب (شوية نحنحة بقي )

مش هتكلم عن أحاسيس الحب و الحياة بقت جميلة و حنيت الدنيا فيك و الجو ده لان ببساطة شديدة فاقد الشئ لا يعطيه لكن هقولكم حاجة واحدة بس متحاولوش تدوروا علي الحب لانه هيجي لوحده و في أغلب الأحيان هتلاقوه جنبكم و أنتم مش واخدين بالكم و خليكم فاكرين دايما أن كل حاجة في وقتها بيبقي ليها احساس مختلف لكن لو استعجلت عمرك ما هتحس بجمال اللحظة .


الاثنين، 27 فبراير 2012

أسف لا يوجد حل

هل الانسان حقير لدرجة انه لا يستطيع تحديد ميعاد انتهاء موته ؟
هل يستطيع مخلوق علي وجه الأرض ان يجعل الانسان يغير رأيه في نفسه ؟
هل يستطيع الانسان أن يخفي مشاعره و ارائه تجاه الحياة حتي لا يدعونه بالهرطقة ؟
هل يستطيع الانسان أن يتحدث مع شخص ليس له موجود ,هو نفسه من صنعه من خياله ليتغلب علي وحدته ؟
هل يستطيع الانسان ان يتوب عن ذنب لم يقترفه بل و الأدهي انه لا يعلم ما هو هذا الذنب الذي جلب عليه لعنات الارض و السماء ؟
و نرجع و نقول بنتنفس ليه ؟
علشان نعيش ، طيب و نعيش لييه ؟
علشان ربنا عايز كده ، وربنا عايز كده ليه ؟
انت هتكفر ولا ايه ، اكيد ربنا ليه حكمة في وجودك حي في هذه الدنيا .
يعني المفروض اعيش 100 سنة و انا مش عارف انا عايش لييه ! انا بقالي 20 سنة مش لاقي اهمية لوجودي مجرد مكان محجوز مش اكتر .
في ناس بتعيش 40 سنة و مش بتوصل لكمية الاحباط اللي انت وصلتله .
ايه العيب اني اقارن نفسي باسكندر ؟ التاريخ احيانا بمجد اشخاص !!
ده واحد مات عنده 33 سنة و مملكته اتوزعت علي 4 من قواده علشان مكنش ليه وريث ، أنتم بتتكلموا في ايه !
الزمن غير الزمن متحاولش تقنع نفسك .
بتغيظني اوي كلمة " الزمن الجميل " مع اني متأكد أن اللي كانوا عايشين في الزمن ده كانوا بيقولوا عليه زمن ابن وسخة و بيقولوا علي الزمن اللي قبله الزمن الجميل .
انها سلسلة متتابعة من الجهل و الهرطقة و الاحلام الزائفة و الاوهام .
الحب ، النجاح ، الشهرة ، المال تلك امثلة بسيطة من الأشياء التي يفني معظم الناس عمرهم وراءها ، هل تستطيع كل تلك الاشياء ان تزيد عمرك يوم أيها الغبي ؟
اذا أصبحت اعظم مخلوق في العالم أو حتي مجرد شخص تافه ، هل الموت سيتركني ؟
لا فالموت هو النتيجة الحتمية لحياة الانسان سواء عاش سنة واحدة او مائة سنة .
لا أجد مبرر لكتاباتي و لا أعلم الموضوع الذي أتحدث فيه و لا أعلم لماذا تقرأون هذا الكلام أصلا و لكن علي أقل تقدير الكلام أفضل من السكوت .
اعلم جيدا أني عبارة عن اكتئاب و قد شكل علي مظهر انسان .
                                                   
                                                                    النهاية ....

الجمعة، 24 فبراير 2012

بكتب ليه !!

أولا أحب أقول ان ده مش مقال و مكنتش ناوي اني انشره علي صفحتي اصلا بس نشرته لسبب انا مش عارفه ، ده غير ان الفكرة مقتبسة من كاتبة فرنسية مش فاكر اسمها ايه .
بعد موجة الاكتئاب الاخيرة اللي عانيت منها أكتشفت اني كتبت كتير اوي في فترة صغيرة لدرجة اني بقيت خايف ، انا هدفي ايه من اللي أنا بكتبه؟ فقررت أكتب هدفي علشان متوهش في نص الطريق .
هو أنا بكتب لييه ؟؟
بكتب علشان أكسر الاحساس بالوحدة اللي عايش فيه معظم اوقاتي .
بكتب علشان عايز بكره يبقي احسن .
بكتب علشان اكسر الملل التقليدي للحياة اليومية .
بكتب علشان مش عايز لما اموت اروح طي النسيان .
بكتب علشان ده قدري ، ربنا خلقني بحب الكتابة ، أعمل ايه انا يعني ؟
بكتب علشان انقد السلبيات اللي فيا و أحاول اخلي الناس متقعش فيها زي ما انا وقعت فيها .
بكتب علشان انا عايز اكتب مش مهم بكتب ايه او هستفاد ايه , ممكن مبقاش احسن كاتب في الكون , ممكن جدا محدش في الدنيا كلها توصله الفكرة اللي عايز اوصلها للناس , بس الكتابة بتمدني باحساس غريب بس بحبه و مش عارفله تفسير .
بكتب علشان يوم ما هبطل كتابة هبقي ميت أكيد .