لاء تصدق عجبتني ، فعلا بفكر اخدك مثلي الأعلي ، بس قولي الأول هي عملت ايه ؟؟ ايه صوتت !! يا عم ده دلع بنات بس أكيد هي اتبسطت ، أصلهم بيحبوا الحاجات دي أوي ، بس مقولتليش صحيح ، أنت عملتلها ايه ؟ طيب هو جسمها كان عامل ازاي ؟ ايه ده هي كانت لابسة عباية ؟ ايه كانت منقبة !! لما لمست جسمها حسيت بايه ؟ حسيت انك راجل صح ؟ طيب ما تجرب مع أمك أو أختك و أهو برده في البيت و محدش هيشوفك ، في الشارع ممكن حد يشوفك و تبقي فضيحة . تصدق فكرة و أهي برده أمك ممكن تحس باللي أنت فيه و تريحك خالص بقي من اللمس اللي من فوق الهدوم ، ايه يا عم زعلت ليه ؟ طيب ما تجرب مع عمتك أو خالتك و لا أقولك هما أكيد عندهم بنات ما تجرب معاهم و أهو محدش واخد باله .
هو ايه يا عم اللي عيب و حرام ، ايه اللي حرمه بس ، يعني هو اللي بيتعمل فينا ده حلال ؟
طيب و النبي بلاش تقولي ان ده يعتبر زنا محارم و زنا المحارم حرام ، يعني لما تلمس جسم واحدة ماشية في الشارع في حالها غصب عنها ده حلال !
عارف هقولك حاجة و بجد صدقني فيها ، كتك نيلة عليك و علي اللي خلفتك اللي لو كانت عارفة انك هتطلع كده ، كانت ساعة ما ولدتك قعدت عليك لحد ما قطعت النفس .
نفسي اسألك سؤال محرج شوية ، أنت بتفكر بايه ؟ مش فاهم السؤال ! يعني من الأخر انت بتمشي ورا دماغك ولا عضوك ؟
صح ربنا خالقه ليه ، علشان تبقي حيحان علي بنات الناس ، صح ، عندك حق !
اسمحلي بقي اقولك بكل فخر ، أنك عار علي الرجولة و اللي تاعبك ده أحسنلك اقطعه .
أولا بكل بساطة ربنا جعل العملية الجنسية بين الرجل و المرأة فيها متعة علشان يحبب الناس في التكاثر و يضمن ان الحياة هتستمر علي الأرض الي يوم الدين . بالمناسبة يوم الدين ده أنت مش عامل حسابه و مش هكلمك عليه ، علشان تلبس أسود في الأخر .
ثانيا ثدي المرأة ربنا خلقه علشان اطعام الرضيع بمعني اصح و من الأخر هو مجرد مصنع لبن ، يعني الطبيعي و المنطقي انه ميثرش اي شهوة عند حضرة جناب سعادتك ، كونك بتحس بالشهوة من النظر للبلوزات المفتوحة يبقي احسنلك تروح تتعالج .
يجيي بقي واحد من بتوع ربنا دول اللي هما دقنهم طويلة و قال ايه بيقولوا انهم أتباع السلف الصالح و يقولي هي السبب ، هي لو كانت لابسة محترم ، مكنش هو بصلها أصلا ، بالرغم من أن منطقه غلط تماما بس خليني معاه للاخر ، طيب أصلا هي ايه اللي نزلها من البيت الست مكانها بيتها ، مجرد أداة جنسية لاشباع رغبات سعادتك ، اصلا هي مش بني ادمه هي أقل من انها تتساوي معاك في الانسانية.
مع العلم في حاجة اسمها غض البصر و لا حضرتك يا عم الشيخ ماشي بنظام لا تقربوا الصلاة و بتسكت ؟؟
حضرتك خلاص هتتجوز علي نفسك في حاجة اسمها استعينوا بالصوم و الصلاة ، ايه مبتقدرش تصوم بس بتقدر تمد ايدك علي بنات الناس ؟ لاء راجل ، يا فرحة أمك بيك .
أناشد كل فتاة مصرية حرة ، متسيبش حقك ، لو حد مد ايده عليكي ، أرجوكي متتنازليش عن أنك تقطعيله عقله قصدي _عضوه_ اللي هو فرحان بيه ، متحاوليش تستني حد يجيبلك حقك و حريتك ، الحق اللي مفيش وراه قوة تحميه بيضيع ، قدرك أنك موجودة في مجتمع ذكوري سادي و قدري أني عايش وسط شريحة عريضة من بني جنسي مصممين يوصموني بعارهم .
ليست هناك تعليقات:
إرسال تعليق