أيون أنا الموكوس و أنا اللي بخرف كمان , موكوس علشان سايب الدنيا و اللي فيها و قاعد بكتب هي يعني الكتابة هتجيبلي عربية ، بخرف علشان عندي أحلام كتير في زمن حرام في الأحلام , لازم تعيش حياة مملة أو مش لازم تعيش أصلا .
موكوس علشان افتكرت أني عملت ثورة و مبقتش عارف اذا كانت فعلا ثورة و لا تمهيد للثورة و لا بشتغل نفسي ولا ايه بالظبط , أكونش باخد ترامادول و أنا ماعرفش!!
أنا الموكوس علشان صدقت العبارة المشهورة " الجيش حمي الثورة " و من ساعتها و أنا شايف الجيش بيقتل شباب كتير من سني بس أحسن مني , طب ليه يموتوا ؟ سؤال يستحق الاجابة .
أنا اللي بخرف علشان مش مقتنع بجملة " الاسلام هو الحل " و لو افترضت ان كلامهم صح ، أغلبية أعضاء البرلمان تابعيين لتيارات الاسلام السياسي ، بقالهم شهر محلوش مشاكل البلد ليه !!!
أنا الموكوس علشان مبفكرش في نفسي و عندي استعداد أموت علشان غيري يعيش أحسن ، مع أن الكل بيحاول يستفيد من الوضع القائم لحسابه ، واحد يبحث عن امارة و واحد يبحث عن قصر منيف و نهود ثقلتهن الحضارة ، ده غير اللي بيتاجروا بدم الشهداء و الافظع من كده اللي بيتاجر بالدين , هل وصلنا لدرجة ان واحد يبيع دينه علشان جاه أو مال !
أنا فعلا موكوس و بخرف !
بس رغم اللي أنا فيه من ضياع و احباط و بسم الله ما شاء الله الدنيا قدامي ضباب في ضباب ، بس أنا أغني واحد في الدنيا دي ، أتحدي أكبر قائد في البلد أنه يقدر يمشي في الشارع لوحده زيي كده و يعمل كل اللي في نفسه !
هو أنهي الاحسن أن الانسان يعيش في قفص من ذهب و لا ينعم بالحرية ؟؟
هو أنهي الاحسن أن الانسان يملك ملايين و لا يملك احترامه لذاته ؟؟
هو أنهي الاحسن أن الانسان يتاجر بدينه ولا يقابل ربه بضمير سليم و نية صافية ؟
جملة مكنتش أحب في يوم أني أكتبها بس للاسف الواقع بيفرض علينا حاجات أصعب من أننا نقدر نتخيلها .
" أحترس ! الثورة ترجع الي الخلف ."
أعذروني ما أنا قلتلكم أنا موكوس و بخرف !!!
ليست هناك تعليقات:
إرسال تعليق