25 يناير 2021
علل فشل ثورة 25 يناير 2011 ؟
1.لان الشعب المصري سئم من الثورة و رضي بالقليل من الحرية و فرط في دم شهداء الثورة .
2. لان الشعب المصري وضع ثقته في المؤسسة العسكرية التي ظل تحت حكمها 60 عاما و هي بدورها استطاعت استعادة النظام البائد و حماية الرئيس مبارك بمساعدة الجماعات الاسلامية .
ده كان تخيلي لسؤال في امتحان تاريخ و لما ولادنا هيسألونا هنبص للارض و نغير الموضوع و هنعيش طول عمرنا نتمني يوم واحد بس نرجع فيه لايام الثورة و نقول يسقط يسقط حكم العسكر و ندافع بكل قوتنا عن حلمنا و حريتنا و منسكتش غير لما نجيب حق الشهداء اللي ماتوا علشان احنا نعيش بحرية و كرامة .
يعني ايه حكم العسكر ؟
يعني تصحي كل يوم من النوم تجري علي تليفونك علشان تكلم صحابك و تشوف مين مات منهم و مين اتصاب .
يعني تبقي في عز شبابك و المستقبل و العمر الطويل قدامك و تكتب وصيتك .
يعني انك تنزل من بيتك و عندك ايقان كامل انك ممكن مترجعش تاني .
يعني انك تكون مستني الموت في كل لحظة و بتفكر هتموت فين و ازاي .
يعني انك تبقي عايز تشوف كل الناس اللي بتحبهم و تسلم عليهم و تودعهم علشان احتمال كبير متشوفهمش تاني .
يعني تبقي واقف في مظاهرة سلمية و جنبك صاحب عمرك واقف بيهتف و فجأة تلاقيه جثة علي الارض .
يعني تهتف و تقول "يا نجيب حقهم يا نموت زيهم" و انت شايف ناس كتير بتموت حواليك و الحمل بيتقل علي ضهرك .
يعني بدل ما تقعد مع صحابك عالقهوة ,تقعدوا كلكم في المدافن قدام قبر واحد منكم و تقروله الفاتحة .
يعني تروح تتفرج علي ماتش كورة و ترجع ملفوف في كفنك .
يعني تلاقي اختك بتتسحل و تتعري في الشارع و واحد قاعد في البيت بيقولك ايه اللي نزلها .
دي ببساطة مميزات احتلال العسكر لمصر , ايوه احتلال في بيان رسمي للمجلس الاعلي للقوات المسلحة اصدره في شهر مارس بيقول فيه ان الفترة الانتقامية 6 شهور . دلوقتي احنا بقالنا سنة يعني مصر عايشها 6 شهور بحكم السلاح و بدون غطاء دستوري او مبرر واضح بما يعني استيلاء علي السلطة .
مش هتكلم عن الاضراب و لا هقول ان اصلا مصر دولة مستهلكة مش منتجة علشان الاضراب يأثر علي الاقتصاد ولا هتكلم عن البورصة اللي محتكرة لحساب شريحة معينة من الشعب المصري و لا هتكلم عن التنكيل بجثث الشهداء و رميها في القمامة ولا حتي هتكلم علي قناصة الداخلية ولا الخرطوش .
هقول حاجة واحدة بس الاضراب العام هو اخر الحلول للحفاظ علي سلمية الثورة اللي في ناس كتير ضحت بروحها و نور عينيها علشان تفضل سلمية , مش هنعيش عبيد مذلولين تاني , مش هنركع لحاكم و ننصبه فرعون ولا هنبني اهرام من الوهم , مش هنقول لضابط شرطة " اسفين يا باشا " ولا هنقبل بمقايضة الامن بالحرية .
ولا قدر الله لو فشل الاعتصام مش هيبقي قدام الثوار غير حل واحد :
العين بالعين و السن بالسن و البادي أظلم
و زي ما قال عم الثوار المصريين
المناضل :أحمد فؤاد نجم
يا شغالين و محرومين يا مسلسلين رجلين و راس
خلاص خلاص ملكوش خلاص غير بالقنابل و الرصاص
ده منطق العصر السعيد عصر الزنوج و الامريكان
الكلمة للنار و الحديد و العدل اخرس او جبان
مفيش بديل مفيش ملاذ يا تجهزوا جيش الخلاص
يا تقولوا علي العالم خلاص
ليست هناك تعليقات:
إرسال تعليق