اعتراف 2

الاعتراف ده موجه لثلاثة أشخاص منهم اتنين بعتبرهم اخواتي فعلا و معرفش اذا كانوا بيبادلوني نفس الاحساس ولا لاء ، يا خوفي لا يكون ده كمان وهم انا عايشه .

أنا فعلا تعبان نفسيا ، يمكن علشان بحب ، يمكن علشان بحاول اقتل الحب ده علشان هو مرفوض و مش قادر ، أينعم هي دي مش أول مرة أحب فيها ، بس بجد دي أول مرة أكتم شعور جوايا لفترة تزيد عن سنة و ده اول اعتراف احب اسجله علي نفسي ، ايوه بحبك من اكتر من سنة و مش مجرد احساس و بس و مش قادر اداريه اكتر من كده و مش عارف انسي و مش مستني رد ولا هطلب فرصة علشان أثبت فيها حسن النوايا ، أنا بحب و مش عارف ايه اللي جاي و مش قادر اتوقع الرد هيكون عامل ازاي بس في كل الأحوال الحب حالة ثورية لا يجوز تقنينها و ده اللي انا بحاول اعمله ، كل اللي اقدر اقوله فعلا بحبك .

بس لو اختذلت مشكلتي النفسية في الحب بس هكون انسان غبي جدا , مشكلتي ان سقف طموحاتي عالي جدا و ده بيشكل عليا ضغط كبير بس هحققها علشان يوم ما اتنازل عن حلم هكون ميت ، أينعم ممكن أضحي بأحلامي كلها علشان بلدي او حبيبتي او حتي صحابي اللي هما اخواتي و اولهم عاصم بس في الظروف العادية هحقق احلامي و مفيش حاجة هتمنعني ، عشت حياتي كلها حابس نفسي بين الكتب ، كلامي كان كتابة علي الورق ، عيني كانت عبارة عن كاميرا ، 80% من خبراتي الحياتية اكتسبتها من الكتب و مش ندمان علي شئ زي ده ، أينعم هو خلاني الا حد ما ساذج و غير قادر علي التواصل مع جميع البشر بس مفيش حد فينا كامل .

ملحوظة أخيرة 

أنا مكتبتش الكلام ده علشان استني من حد كلمة عطف او تشجيع علشان مش محتاج حاجة من حد ، بقيت مقتنع اني اتولدت لوحدي و هموت لوحدي ، أنا كتبت ده علشان اعرف انا فين و رايح علي فين بس مش اكتر !!