غالبا انا لما كنت بقول اني بجد اتغيرت كنت بحاول اقنع نفسي اني فعلا اتغيرت بس اللي مكنتش متخيله ان دي فعلا حقيقة , طول عمري مجنون سفر و ده من أهم الاسباب اللي خلتني أدخل هندسة بحرية كل يومين في بلد شكل و فسح و تنطيط و اخر روقان بس لاول مرة ان لما يسألوني ناوي تسافر فين الصيف ده أسكت و معرفش أرد و كان ردي كالاتي انا لسه مقررتش , طبعا هي اتفهمت اني لسه مقررتش اسافر فين بس الحقيقة اني لسه مقررتش اذا كنت هسافر تاني ولا لاء ؟ مش هقدر ابعد عن اسكندرية تاني , بقيت بحب الزحمة , الناس , الولاد الصغيرة اللي في الاشارات تمسح ازاز عربيتي , ست كبيرة بتبيع مناديل و تدعيلك دعوة حلوة , لما الاقي نفسي وقعت في مشكلة و ناس كتير معرفهاش واقفة جنبي و تساعدني بعد كده تمشي بدون حتي متستني كلمة شكر . كل المواقف دي بشوفها قدامي و انا بتخيل اني داخل المينا و المركب بتبعد عن شط اسكندرية . بلدنا بجد اجمل بلد في العالم و ده مش كلام ده واقع حتي بالزبالة اللي مرمية في الشارع , بره مصر بحس بالخنقة اللي في كتير من الاوقات بتقلب علي نوع من الاكتئاب كل حاجة مثالية اوي و ده في حد ذاته مخنق جدا , طبيعة الانسان اساسا معقدة , ساعات مبسوط ساعات زعلان , بيحب , بيكره , غضبان , عايز ينتقم , مكسور , محبط هو الانسان ربنا خلقه بكيمياء غريبة محدش قدر يفسرها الي الان . بقيت بجد بحس ان روحي بتتسحب مني حتي لو سافرت القاهرة , اسكندرية بالنسبالي حاجة تانية مش مجرد مدينة بتربطني بيها ذكريات, لاء , اسكندرية عايشة جوايا .
الشط اللي انا قاعد عليه دلوقتي سيد درويش كان قاعد عليه و هو بيألف موسيقي باقية مع الزمن , بيرم التونسي كان بيألف اشعاره و هي قاعد في نفس مكاني , الشط ده شاهد علي عبد الله النديم و بيرم و سيد و يوسف شاهين . الشط ده شاهد علي ظلم المخلوع لما شوه مظهره بالمباني عليه .
دلوقتي بقي مستني تجيلي الجرأة الكافية اني اقولها , بلدي أولي بيا يلعان أبو الفلوس و الشهرة و النجاح اللي هيتحققوا علي انقاد سلب روحي مني .
ليست هناك تعليقات:
إرسال تعليق