فكرت كتير اول بلوج اكتبها تبقي عبارة عن ايه , غالبا المفروض تكون حاجة اخرج فيها كل طاقاتي الكتابية علشان ابين للناس ان انا موهوب , بس أنا مش بكتب للناس أنا بكتب لنفسي ,طبعا رأي الناس مهم جدا بس الأهم مدي اقتناعي باللي أنا بكتبه علشان كدا قررت اني اكتب اول بلوج باللغة العامية بالرغم من كرهي للاسلوب ده من الكتابة بحس انه تشويه للغة و اهانة للتراث , ما علينا من الكلام الكبير ده . المهك قررت اتكلم في حياتي الزوجية المستقبلية و مواصفات شريكة حياتي .
كنت قاعد بتخيل نفسي لما اتجوز هبقي عامل ازاي ؟ هل هابقي زي الرجالة الشرقيين عايز كل حاجة علي الجاهز , بحتقر الست و بعاملها كأنها مخلوق اقل مني موجود لمتعتي الجنسية بس ؟ مبدأيا لو انا بفكر بالطريقة دي يبقي أنا أستحق لقب حيوان و بجدارة . و برده مش هقول الجواز شركة بين اتنين بيحبوا بعض و كلام الافلام ده بس عايز اقول حاجة بسيطة جدا (كلامي للولاد) تخيل ان كل يوم في حاجة في بطنك عمالة بتكبر لمدة تسع شهور و بعد كده بتخرج من جسمك , تخيل كمية الالام اللي هتحس بيها لما شئ وزنه اكتر من كيلو يخرج منك , عن نفسي جسمي بيقشعر لمجرد الفكرة بجد ربنا يكون في عونهم .
هختار شريكة حياتي ازاي ؟ اولا لازم تكون محجبة و عمرها ما كلمت ولد في حياتها و طبعا تكون نقاوة امي . دي الاجابات المشتركة عند معظم الشباب و انا احب اقول الكلام ده عظيم جدا بس في حالة واحدة بس لو انا بشتري طماطم مش اكتر و بستغرب جدا لما واحد يبقي قاعد مع صحابه و يقول شفت بنت فعجبتني و مشيت وراها عرفت انها محترمة و قررت اتقدملها , برده الكلام ده عظيم جدا بس لو بشتري جاموسة مش اكتر . خلينا واقعيين شوية واحدة انا و هي اخترنا اننا نكمل حياتنا مع بعض بمعني اننا متفقين اننا نعيش جسدين بروح واحدة و ده شئ مش سهل علشان بيفرض علي كل واحد انه يحاول يحسس التاني بالسعادة و علشان يحس بالسعادة لازم ميتحرمش من الحاجات اللي هو بيحبها مثلا لو الانسانة اللي هتكون شريكة حياتي بتمارس رياضة معينة لازم بعد الجواز اعمل قرد انها متبطلش تمارسها بسبب ضغط شغل البيت عليها متهيألي لو عملت الاكل يوم ده مش هينقص من رجولتي حاجة و هي نفسها هتقدر محاولاتي انها تبقي سعيدة و هنعيش في حالة مستمرة من الحب . اللي انا برتبط بيها دي انسان زيها زيي ليها شخصية مستقلة و طموح و هدف في حياتها , لازم اساعدها تحقق اهدافها و تحس بذاتها .
بالنسبة بقي لموضوع ان الحجاب هو ايقونة العفة و الطهارة خلينا واقعيين مش لازم ناخد بالمظاهر المظاهر دايما بتخدع , ايه المانع انها تكون متبرجة بس محترمة ! ليها صحاب ولاد كتير بس حاطة حدود محدش يقدر يعديها و اللي بيعديها بتعرف ازاي توقفه عند حده و تديله بالجزمة ؟ بالنسبالي مجرد اني حبيت انسانة يعني بثق فيها ثقة عمياء فلو سبتها وسط الف ولد هكون مطمن علشان عارفها كويس و عارف اخلاقها لكن هعيش انا و هي في دايرة الشك نبقي بنضيع وقت عالفاضي . أصلا فكرة ان البنت لازم تبقي محافظة علي عذريتها علشان تسلمها للانسان اللي هتتجوزه فكرة عنصرية جدا , ازاي انت بتسمح لنفسك انك تعمل بلاوي سودا مع بنات و عاهرات طول عمرك و تقول طيش شباب و كبت و في نفس الوقت شرطك الاساسي في الجواز انها تكون عمرها ما كلمت ولد ,يلعن ابو الازدواجية .
عن نفسي مش شايف انه عيب اني اقول اني كولد محافظ علي عذريتي علشان اسلمها لشريكة حياتي , مش هقبل علي نفسي في يوم من الايام ان يبقي ليا علاقة جنسية غرضها المتعة مع اي واحدة و اروح اتجوز واحدة محافظة علي نفسها علشان انسان ميستاهلش و عديم المسئولية .
الجواز يعني مساواة و المساواة مبنية علي اساس التضحيات و الفرق كبير اوي بين اني بختار شريكة حياتي او بشتري جارية و الجواز اساسه الحب , اتنين بيحبوا بعض وصلوا لدرجة انهم ميقدروش يستغنوا عن بعض فقرروا يكملوا حياتهم سوا فاتجوزوا و شكرا .
رغيت كتير و طولت عليكم بس سامحوني
طبعا بدايتك كويسه اوي لكن رأيي في الموضوع ده اولا انا معاك نسبيا ان لازم يكون في حب وتكون المعامله بينهم كزوج وزوجة مش سي السيد وجاريته بالنسبة للجزء التاني انا مش معاك بتاتا بمعني مينفعش احب واتجوز واحدة وانا عارف انها تعرف 30 شاب غيري ده ابقى قرن وديوس
ردحذفوربنا يوفقك ونشوف اعمالك الجديدة دايما
أحم أظن انك عملت زي اللي بيقولوا لا تقربوا الصلاة و بيسكتوا
ردحذفاضف الي معلوماتك انها ديوث مش ديوس
ردحذفشكرا على الاضافة ويعني ايه تعليقك؟ معلش وضح
ردحذفاللي اقصده بكل بساطة هي انسانة طبيعية ليها حياتها و صحابها و اهدافها , انت المفروض بتحبها يعني واثق فيها و هي كمان واثقة فيك يبقي مفيش قلق من حاجة فمش مجرد وجودها وسط ولاد ده هيقلل من حبها ليك
ردحذفهو لو ده قصدك بس يبقى انت كده تمام .. وبعدين يا حبيبي انت عرضت رأيك بكل صراحة وكل جرأة ودي كفاية لان قليل اوووي اللي بيبقى صريح مع نفسه
ردحذفاشكرك يا صديقي
ردحذف